உங்கள் Excel அறிவை மதிப்பிடலாமா

Excel மீதான உங்கள் ஆளுமையின் அளவை அறிவதற்கு இங்கு ஒரு கருத்து கணிப்பை இணைத்துள்ளேன், நான்கு நிலைகளையும் (Levels) தெரிவுகளாக கொடுத்துள்ளேன். இதனை தமிழ்படுத்த வேண்டுமெனில், தொடக்கநிலை, இடைநிலை, உயர்நிலை, மேல்நிலை எனக் கொள்ளலாம் (நமது கல்விமுறையின் படிநிலைகளை மனதில் கொள்க). இந்த நான்கு நிலைகளுக்குமான என்னுடைய விளக்கங்கள் இதோ,

தொடக்க நிலை (Beginner)

Windows சார்ந்த மென்பொருட்களின் செயல்பாடு குறித்த அடிப்படைகளை அறிந்தவர்களை இப்பிரிவில் சேர்க்கலாம், அதாவது கோப்புகளை திறத்தல், தரவுகளை உள்ளிடுதல் (data entry), சேமித்தல், சிறு சிறு எளிய அட்டவணைகளை (Table) உருவாக்குதல் போன்றவற்றை சிரமமின்றி செய்ய இவர்களால் இயலும்.

இந்த நிலையில் இருப்பவர்கள் அறிந்திருக்கக்கூடிய (வேண்டிய) Functions என நான் கருதுவது SUM, COUNT, AVERAGE, ROUND, MIN, MAX.

மேலும் Auto filter பயன்படுத்துவதன் அடிப்படை குறித்தும் அறிந்திருக்க வேண்டும்.

இடைநிலை (Intermediate)

Pivot Table என்றால் என்ன, அத்தனை எப்படி உருவாகுவது, எவ்வாறு தேவைக்கேற்ப மாற்றி அமைப்பது என்பது குறித்து அறிந்திருக்க வேண்டும்.

கொஞ்சம் சிக்கலான Auto Filter பயன்பாடு குறித்து அறிந்திருக்க வேண்டும், அதாவது, இரு நிபந்தனைகளுக்கேற்ப (Conditions) Filter அமைப்பது, இரு மதிப்புகளுக்கு (values) இடைப்பட்ட தரவுகளை தேர்ந்தெடுப்பது.

Data Validation அடிப்படைகள் தெரிந்திருக்க வேண்டும்.

மீண்டும் மீண்டும் செய்யப்படும் (Repeated tasks) வேலைகளுக்காக Macro ஒன்றை எப்படி பதிவு செய்வது (Record Macro) என்பது குறித்தும், பதிவு செய்த Macro-வில் சிறு மாற்றங்கள் செய்வது குறித்தும் அறிந்திருக்க வேண்டும்.

இந்த வகையில் வருபவர்கள் அறிந்திருக்க வேண்டிய Functions,
IF, AND, OR, VLOOKUP, SUMIF, COUNTIF, RANK, LEFT, RIGHT, LEN, CONCATENATE


உயர்நிலை (Advanced)

Array Formula பற்றி அறிந்திருக்க வேண்டும்.

Dependent Data validation போன்ற அடுத்த நிலை கருவிகள் (Tools) குறித்து அறிந்திருக்க வேண்டும்.

Macro Recorder உதவி இன்றி, தானே Macro Code செய்து, இயக்கும் திறன் பெற்றிருக்க வேண்டும்.
நிகழ்வுகளால் தூண்டப்படும் (Event driven) Macro குறித்து அறிந்திருக்க வேண்டும்.

இவர்கள் அறிந்திருக்கவேண்டிய Functions சில,
INDEX, MATCH, OFFSET, SUMPRODUCT, INDIRECT, SUBSTITUTE, ROW, COLUMN, DATE, SMALL, LARGE


மேல்நிலை (Expert)

இந்த நிலை சார்ந்தவர்களை இருவகையாய் பிரிக்க எண்ணுகிறேன், முதல்வகை, VB ப்ரோக்ராமிலிருந்து இறக்குமதி ஆனவர்கள், இவர்களுக்கு Excel ன் உள்ளிணைப்பான (In built) Functions குறித்து அதிகம் தெரியாது. ப்ரோக்ராமிங் கண்ணோட்டத்திலேயே எந்த விஷயத்தையும் அணுகுவார்கள். இவர்களால் பயனாளர் தேவைக்கேற்ற Functions (User defined) உருவாக்க இயலும். மேலும் உள்ளிணைக்கப்பட்ட Functions கூட இவர்களால் மீண்டும் எழுதப்படலாம்.

மற்றொரு வகை, உயர்நிலை திறமையாளர்களின் மேம்பட்ட நிலையினர், உயர்நிலை பயன்பாட்டாளர்களால் பல Functions பயன்படுத்த இயலும் என்றாலும், ஒன்றினுள் ஒன்றாய் கோர்க்கப்பட்ட, சிக்கலான Formulas மேல்நிலை பயனர்களால் தான் உருவாக்க இயலும்.


மேல் குறிப்பிட்ட நிலைகள் தவிர, தங்கள் துறை சார்ந்த Functions பற்றி மட்டும் ஆழமாக கற்றவர்கள், எடுத்துக்காட்டாக, அக்கவுண்ட்ஸ் துறையை சார்ந்தவர்கள் IRR, NPV போன்ற Financial Functions மீது மட்டும் தனி கவனம்செலுத்துவார்கள்.

இங்கு குறிப்பிடப்பட்டுள்ள நிலைகளும், அதற்கான தகுதிகளும், என் சொந்த விருப்பத்தின் அடிப்படையில் அமைந்தவை, இவற்றில் ஏதேனும் கருத்து மாறுபாடுகள் இருப்பின் பின்னூட்டத்தில் தெரிவிக்கலாம்.


எழுதுவதாய் முடிவுசெய்து வலைப்பூவும் தொடங்கியபின், எங்கிருந்து எழுத்தை துவக்குவது என்ற குழப்பத்திலேயே மூன்று வாரங்கள் ஓடிவிட்டன. இந்த காலகட்டத்தில் என்னை உற்சாகப்படுத்திய (நைஜீரியா) ராகவனுக்கும், பின்னூட்டமிட்ட அன்பர்களுக்கும் நன்றி. இனி தொடர்ந்து எழுதுவேன்


நன்றி
சங்கர்